شركة هواوي من الشركات اللي ساهمت في تغير مفهوم المستخدمين في العالم عن المنتج الصيني و قدرت انها تنافس و تحتل الصدارة من اكبر الشركات ,,
في البوست ده هتشوف تحليل لاداء الشركة في مصر و حجات يمكن تكون اول مرة تعرفها عنها :D
كالعادة لما تيجي تبص علي شركة لازم تاخذ لمحة كدا عن تاريخ الشركة ,,
شركة هواوي اتأسست سنة 1987 في مدينة شينزين الصينية و المؤسس كان مهندس في جيش التحرير الشعبي الصيني ,,
بدءت الشركة كشركة صغيرة بتصنع سويتشات التيلفونات مش اكتر ,, لكن طبعا مع الوقت كبر الموضوع معاها و كبر البيزنس و بدءت تتوسع في مجالات تانية ,,
كانت كل استثمارات الشركة متوجهة في مجال الشبكات و اجهزة الاتصالات و قدرت الشركة انها تبقي الشركة رقم 1 في المجال ده في سنة 2012 بعد ما عديت لاول مرة شركة ايركسون السويدية اللي كانت متربعة علي عرش مجال الشبكات و هي شركة متأسسة قبل هواوي باكتر من 100 سنة .
اسم الشركة حصل عليه اختلاف كبير اوي في طريقة نطقه و السبب انه اسم صيني.. و في منا اللي بيقوله هواي :D الشركة في سنة 2012 اول ما ظهرت عملت فيديو في امريكا عشان تقول الناس ازاي ينطقوا اسمها صح و هي قالت ان اسمها بيتنطق ( واواي - Wah Way ) لكن في الواقع اسم الشركة بينطق بطريقتين و ده بسبب ان اللغة الصينية لها لهجتين و هما
لهجة Mandarin و لهجة Cantonese ,,
لو هتنطق الاسم بلهجة Mandarin مع العلم ان مقر الشركة اصلا بيقع في منطقة بيتكلموا باللهجة دي فالنطق الصحيح ليها هو زي المتعارف عليه عندنا و هو ( هواوي - Hwa Way ) و دي الطريقة اللي رئيس الشركة بالفعل بينطق بيها اسم الشركة في مؤتمراتها الرسمية و هبقي اسيبلكم فيديو في الكومنتات لرئيس الشركة و هو بينطقها :D
اللهجة التانية اللي هي Cantonese و دي بتتنطق بيها اقرب للنطق اللي الشركة في امريكا قالت انه الصحيح اللي هو ( Wah Way ) عموما الشركة قالت الاسم ده لأنه الاسهل بالنسبة للناس في العالم . و الاقرب للانجليزية.
اما بقي معني الاسم فباللغة الصينية الاسم بينقسم لجزءين الجزء الاول كان بيعني وردة عشان كدا علامة الشركة وردة ,, لكن الجزء ده حاليا بقي بيرمز للصين.
الجزء التاني يعني ( انجازات ) او Achievements و بكدا بيبقي الاسم علي بعضه
China Achievement - انجاز الصين
في نفس سنة 2012 اللي هواوي بقيت رقم 1 في الشبكات بدءت طريقها كشركة صغيرة في مجال الهواتف الذكية بنظام الاندرويد و الويندوزفون و دخلت مصر في النص الثاني من سنة 2012 .
الشركة بعد كدا سابت ويندوزفون لأنه حسب تصريح رئيس الشركة اللي قال اللي عايز يخسر فلوس يصنع ويندوزفون :D
و ركزت كل جهودها في الاندرويد و كعادة الشركات الصينية فدخولها في السوق المصري و كل الاسواق كان عن طريق الهواتف الاقتصادية. و كانت الشركة بتسمي الاول هواتفها باسم اسند و ده عشان الناس مكنتش متعودة تنطق اسم الشركة زي ما قولنا لكنها دلوقتي شالت كلمة اسند دي لأن خلاص الناس بقيت بتعرف تنطق الاسم :D
بشكل سريع جدا في السوق المصري شركة هواوي قدرت من 2012 حتي وقتنا حالي تتحول من براند صينية الناس مش بتحب تشتريها لبراند متقلش في اسمها عن سامسونج عند المصريين ,,
بالنسبة لينا احنا كناس بننصح بموبايلات من سنة 2013 فشوفنا ازاي التطور ده حصل ,, ازاي كنا بنحاول ننصح زمان بهواوي و كانت الناس بتبقي رافضة و مش متقبلة انها تشتري براند صيني ,, لدلوقتي اللي بنلاقي الناس بتقول عايزين هواوي نقوله بس هو في الفئة دي في احسن منه فيبقي بردو مش متقبل غير انه يشتري هواوي لأنه براند و لأنه عمل اسم و سمعة ممتازة.
السمعة دي مكنتش من فراغ لكن كانت بسلسلة موبايلات بجودة محترمة جدا باسعار ممتازة زي الهواوي جي 610 و 630 و جي 730 و حتي الجي 7 اللي كان وقتها بيقدم جسم معدني لاول مرة في فئة ال2000 جنيه ,
و كمان الهونور 6 اللي كان وقتها ارخص هاتف ب 3 جيجا رام. و طبعا الميت 7 اللي كان افضل البطاريات في السوق و سعره كان في حدود 3000 ل 4000 جنيه ,, و كمان البي 8 و سلسلة هواتفها الراقية ,,
بعدها الشركة بدءت تعمل حملات اعلانية محترمة في مصر بمساعدة نجوم و مغنيين اشهرهم طبعا نانسي عجرم اللي كانت بتعمل اعلان للميت 7. و الميت 7 بالمناسبة كان معروف بموبايل نانسي :D
لما روحنا معرض Cairo ICT 2014 و كان ميت 7 لسا معروض وقتها كان جناح هواوي فيها حاطت صور نانسي عجرم كبيرة بالموبايل و كان الناس و انا واقف متعرفش اسم الموبايل لكن بتخش تسأل هو فين موبايل نانسي :D
بعدها عملت حملات اونلاين و بدءت انها تنتهج نهج اونلاين بأنها تتفق مع مراجعين تسفرهم الصين يشوفوا المقر بتاعها و انها تدعوهم لحفلات اطلاق هواتفها و توفر لهم الهواتف بتاعتها عشان يعملوا لها مراجعات بطرق مختلفة و ده اللي يخلي السوشيل ميديا دايما بيتكلم علي هواوي !
انتشرت اكتر بقي عندها بدل الوكيل 3 :D و اخيرا بقي وكيلها هو يونيون جروب بدل ما كان وكيل سامسونج !
بقيت رقم 2 في مصر بعد سامسونج و مش هتستغرب لما قريب تبقي رقم 1 لأن حصتها السوقية بتعلي بشكل رهيب في ظل عدم اهتمام سامسونج بالفئة الرخيصة و المتوسطة و تركيز سامسونج علي سلسلة النوت و الاس ..
هواوي مش بس تفوقت في مصر لكنها عالميا بقيت من اكبر الشركات في المبيعات بالتحديد بقيت رقم 3 بعد سامسونج و ابل و قريبة جدا من حصة ابل السوقية ! ( طبعا مش ارباح ابل ارباح ابل اضعافها )
الا انها الي حد ما زيها زي اي براند صيني بيعاني شوية في السوق الامريكي فالامور مش حلوة معاها اوي زي مصر و دول اسيا .. لكنها بردو بدءت يبقي لها صوت كويس في امريكا بذات بعض النيكسس 6 بي اللي كان من انتاجها.
مع النجاح ده فاكيد هواوي اتجهت بعد كدا لرفع اسعارها شويتين تلاتة و الي حد ما فئة المنخفضة مبقتش تقدم فيها هواتف منافسة زي زمان ,, بدءت اغلابية هواتفها تبقي اسعارها اعلي من المنافسين لكن ده عادي في ظل ان الناس لسا بتشتري بردو لأن خلاص البراند اخذ وضعه :D
النجاح ده لا يمنع من وجود شوية عيوب في هواوي اولها كعادة اغلب شركات الصينية هي السوفتوير :
اللي بيبقي فيه شبه شويتين تلاتة من ابل و بيبقي الي حد ما الناس ممكن متحبوش اوي .. كمان تحديثاتها الضعيفة جدا لاجهزتها و دي الي حد ما بدءت تتصلح و بدء يبقي في تحديثات للجديد عكس القديم اللي مكنش فيه خالص تحديثات.
و العيب التاني زي ما قولت بسبب انها خلاص بقيت براند واخذ وضعه اسعارها بدءت ترفع عن ما كانت زمان و بقي في منافسين اقوي منها و بيقدموا عتاد اقوي مع جودة كويسة و باسعار اقل بردو.
كمان الشركة مش بتقدم دعم للمطورين اللي بيعملوا رومات لمعالجاتها كايرن بالتالي مش بتلاقي دايما اي رومات او حجات كتير لاجهزتها اللي بتشتغل بمعالج كايرن.
و بس دي كانت هواوي في 4 سنين في السوق المصري :D
البوست من سلسلة #الشركات_ع_الميزان و اول بوست كان عن انفنكس فممكن تدخل علي الهاشتاج عشان تشوفه ..
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon